Lu tempu anticu

Com’era graziusu lu me paisi
taliati oramai com’è stracanciatu
riccuni era chiddu cu tri cammisi
però lu cori nun era angustiatu.
Ngrasciatu ora viri puru lu mari
nfittata è l’aria e cchiu nun rispiru
nfirnali scrusci nun fannu pinzari
l’aceddu è mortu e nun torna a lu niru

Pirduta è la duci, vecchia armunia:
niscennu si sulu mmenzu a la genti
ammatula cerchi a cu penza a tia
canciaru testa vicini e parenti.
S’affuddanu tutti, poviri pazzi,
currennu sempri – cu sapi unni vannu –
e mancianu puru si sunnu sazi
scuntenti sempri di chiddu chi hannu

Chiui la porta e la finestra
astuta la luci e fammi durmiri
vogghiu sunnari lu tempu anticu
quann’era ancora nicu nicu.

Riviu na strata tutta nfangata
matina d’invernu, lentu sbrizzia
cumpari un carrettu di la vutata
arranca lu mulu, e forti tistia
Na vuci sentu abbanniari virdura
miscannusi duci cu la campana.

È già susuta me matri a chist’ura;
m’aggiusta la cutra e poi s’alluntana

Spittusa lu suli, li nigghiceddi
na fimmina nesci e va a la funtana
già sciamanu fora li picciutteddi
travagghia, la vecchia, svelta, la lana.
Chi granni dilizia ddu ciuciulari
chi fannu l’aceddi nmenzu a li rami
a lu granni Diu stannu a priari
na lodi a lu re e a lu so ri riami

Chiui … (RIT)

Acchiana a lu celu l’Avi a Maria
cuddatu lu suli, friddu fa fora
allonga lu passu cu è pi la via
vidennu fumari li fumarola
Mmriachi di ciauri sunnu li strati
prissepi di luci e casi vucianti
di la vicina l’avuti mannati
la vecchia sula, du favi fumanti

Risentu cunti di fati e rignanti
attornu a lu luci sunnu assittati
li facci alluccuti, l’occhi sunnanti,
scurdati tutti li peni pruvati.
Tramunta lu suli e surgi la luna
ricorda lu vecchiu l’anni filici
ci spuntanu l’armi cu sta canzuna
pinzannu ch’è veru chiddu chi dici

Chiudi … (RIT)