Munnu pirdutu

Da “Biancaneve in Sicilia” – di G. Prestigiacomo e P. Riccobono.

Semu setti ‘ncarcateddi nichi nichi
v’arrivamu a malapena a li viddichi
ma pi testa semu megghiu di certuni
ca la menti tenu china di miliuni.

Sazzi semu di lu munnu e lu lassamu
sazzi semu di lu munnu e lu lassamu:
lu sapemu lu pruverbiu l’ha insignatu
megghiu sulu ca mala accumpagnatu.

Civili, vuatri stu munnu chiamati.
Sintiti è megghiu ca cchiu nun parrati
Amuri e paci a tutti diciti
cannuni e bummi poi ci vinniti.

La liggi, si dici, ppi tutti è la stissa;
li tassi, li paga pi tutti cu è fissa
Sparraciuniati di libertà
e nni faciti sulu pietà

Ma chi vi criditi? Patruni nun siti
di nzoccu pinsati e nzoccu faciti:
pariti tanti scecchi ‘mpajati,
girati d’unni siti tirati.

Munnu civili, munnu pirdutu
Puru lu tempu pari impazzutu!
Vuatri però nun putiti scappari
stu munnu cca l’aviti a canciari.